Pennaeth newydd Hyfforddiant ac Addysg Gychwynnol Athrawon

11.12.2009

Mae Mrs Marian Thomas wedi cael ei phenodi yn bennaeth ar yr Ysgol Hyfforddiant ac Addysg Gychwynnol Athrawon yng Ngholeg Prifysgol y Drindod yn olynydd i Dr Dylan Vaughan Jones.

Yn raddedig o Brifysgol Aberystwyth, mae Mrs Thomas yn athrawes brofiadol yn y Gymraeg a Chymraeg fel ail iaith sydd wedi gweithio mewn ysgolion ledled Cymru yn cynnwys fel Pennaeth Adran yn ysgolion Syr Thomas Picton, Hwlffordd, Ysgol Gyfun Aberteifi ac Ysgol Gyfun y Strade, Llanelli.

Bu’n Athrawes Ymgynghorol yn Sir Dyfed ac yn Ymgynghorydd Ysgolion Ardal Cyngor Sir Penfro rhwng 2000 a 2007 cyn dod i’r Drindod fel Ymgynghorydd Addysg Gymraeg.

Tra yn y Drindod mae Marian wedi bod yn gyfrifol am ddiweddaru cynllun, a ddefnyddir gan adrannau Hyfforddiant Addysg Gychwynnol Athrawon ar draws Cymru, i ddatblygu sgiliau dysgu Cymraeg i blant ail-iaith mewn ysgolion cynradd. Ariennir y cynllun drwy’r Ganolfan Addysg Uwch Cyfrwng Cymraeg a bydd yn cael ei lansio yn y flwyddyn newydd.

Dywedodd Marian am ei phenodiad 'Teimlaf hi'n fraint cael arwain tîm mor flaengar ym maes hyfforddiant cychwynnol athrawon. Gweithiwn mewn partneriaeth ag ysgolion yr ardaloedd cyfagos gyda'r nod o ddarparu addysg o'r radd flaenaf i ddisgyblion. Mae datblygu gweithlu i hyrwyddo dwyieithrwydd ar draws y sector hefyd yn flaenoriaeth gennym.'

D I W E D D

Manylion pellach

Eleri Beynon
01267 676790

Gweld pob eitem o'r newyddion...